鹹點甜點都好正, 我會翻兜再翻兜 - Passion by Gerard Dubois

上幾個星期去灣仔食割包時路經此店，看到門口有幾張歐陸風情的檯櫈，入面售賣著象徵高貴的馬卡龍，精緻玲瓏的甜品，近門口有幾條硬到打死人的法包，而且時不時有幾個老外入去買包買餅，如此濃郁異國情懷點可以唔bookmark Passion by Gerard Dubois? 

終於今日(打食評已是N日後)放工時間約埋男友黎呢到try1try。入面有幾張二人檯，兩張大高檯，七點幾黎到，食客唔多，可以揀位坐。

全部都咁靚咁正,叫人點揀?

法式鹹派 Quiche - 法文裡“Quiche”是來自德文的Kuchen，意味著“蛋糕”， 是一種鹹的派 (From Google)

鹹點方面，好快揀左Salmon Quiche，因為本人愛好salmon，無計 哈哈.... 
Quiche可以凍食或熱食，我地選擇左後者，熱既Quiche上檯時香氣撲鼻，面頭是香草同蛋，下層就係三文魚，外面用撻皮包住，所有餡料份量同撻皮厚薄度拿捏恰到好處，不油不膩不滯，超級好食！ 

至於甜品，每樣都咁精緻叫人難以取捨，選擇困難症既我來來回回行左十幾圈好似巡鋪咁先揀到三件。

Passion Chocolat
立立令既半圓朱古力面，需要十級勇氣先可以吉第一刀，吉左落去好似做左千古罪人咁破壞左佢既完美，食第一口.....好味極了....朱古力味道同mousse甜度適中，唔會膩，食到中間黃色個d似是檸檬蓉，夾埋一齊食酸酸甜甜好正呀！ 

Framboisie Chocolat 
粒紅桑子無特別，舊cake好特別。經拖肥、mousse、莓蓉、蛋糕組合而成的Framboisie竟如此配合，如此美味，味道都係酸酸甜甜，我諗食多幾舊都唔會膩（最多會肥），唯一麻煩係面個塊朱古力叉極都死唔斷開，唔可以完整地吉一個正方形黎食。（強迫症個性表露無遺）

 Green Tea on chocolate (cupcake) 
出面街食到呢個素質，我會比70分，但食完上面幾舊無懈可擊既餅後，我只可比呢個cupcake 40分，本身舊cream(or mousses?)味道偏淡，要靠粉去特出綠茶味，食cream(or mousses?)食到似雪糕真係第一次，同埋佢d cream(or mousses?)有大半杯咁多，清晒上面堆野先食到底既蛋糕，係淨係蛋糕乜餸都無，佢個名真係無改錯，green tea only on chocolate cake。 

雖然有件cake略為遜色，但overall都好滿意好好食好有水準好法式情懷好品味生活。我會再黎架！