解扣金磚 - 南龍冰室

有些東西包裝精美, 引人愛不釋手, 可是當你試過用過後, 就發現只是虛有其表。說的是南龍冰室的金磚飯.... 

南龍冰室走懷舊路線, 裝修成六七十年代的冰室, 天花掛著一個個雀籠, 牆身整成一排百子櫃, 地下鋪了懷舊花花地磚, 是個讓人不自覺狂按相機快門的地方, 但.......餐牌的公仔也太可愛了吧.....這可愛的餐牌跟摩登融合傳統的裝潢好像不太匹配。 

今天和男友來南龍冰室只有一個目的, 就是吃金磚炒飯, 因為這金磚外表實在太太太吸引 太太太有份量!!! 金磚炒飯有幾款配搭: 雞, 龍脷柳, 豬, 牛, 咖哩或茄汁, 左諗右諗揀了茄汁焗雞, 而飲品呢就選了街外餐廳好少供應的凍唂咕。 

凍唂咕 
好濃郁的可可飲品, 比朱古力好的是佢唔甜, 味道沖得剛剛好, 好飲!! 

金磚茄汁焗雞飯 
碟飯一上檯, 我, 男友, 坐對面的搭檯男女一齊嘩了聲!! 真係好巨型!!! 而食呢個金磚都有返咁上下難度, 個麵包有d難切, 面個層dip餐廳另外提供既一碗仔茄汁好正, 好脆口, 但底層就較為一般, 唯一既餸 - 雞就無乜特別, 而飯呢, 就真係中下啦, 硬而且有飯焦, 比既份量又好少, 約一碗啦, 是expect我地食埋個包會飽死嗎..... 

金磚底部全部都係包, 真係又飽又滯, 我地寧願食多d飯啦。 

外表好吸引, 食落好一般, 試過就算了。

------------------------------------------------
南龍冰室  Nam Loong Cafe
銅鑼灣敬誠街1-3號地舖及1樓

綠茶白巧克力凍飲 - Godiva Chocolatier

食過Godiva的香滑濃味朱古力軟雪糕，嗚呀，齒頰留香回味無窮呀，往後逢經過Godiva都按奈著，默念「鄭多燕…鄭多燕」或「二百磅…二百磅」來阻止自己衝入去買雪糕食。

但今次，這個綠茶白巧克力凍飲，是2014春夏新出的呀，Limited Edition的呀，有我很喜歡的綠茶+Godiva無得輸的朱古力呀，咩好肥咩好鬼肥都聽不不耳。我．要．飲．你。 

來到沙田新城市，原本在二樓的Godiva搬左去地下，沒所謂啦，即使你搬左去天腳底或搬左去要行29層樓梯的地方，為了綠茶白巧克力凍飲我也會去找你（誇）。 

綠茶白巧克力凍飲拎上手後大口大口啜，嘩.... 好滑的奶，好香的綠茶，加上打碎了的白朱古力及令人又愛又恨的肥cream，甜而不滯，口感豐富，非常好飲，無令我失望呀！

天呀，Godiva你要整肥天下女人才心熄嗎？

西九中心新食力 - 皇帝雞

去西九龍中心食野, 大腦即刻Load出什麼食店? 地獄壽司明將? 門口得卷蓆的隱世拉麵? 還有第三間值得浮現腦海的, 是賣韓式炸雞的皇帝雞。

皇帝雞位於西九龍中心8樓food court, 這個food court跟樓下蘋果商場模式一樣, 每間鋪面積細, 租金相對地平, 這樣也好, 令小本創業在寸金呎土的香港下有地方生存 (再殺出新血路 raorrrr~~~)。這間皇帝雞的廚房面積細細, 由韓國夫婦二人經營, 賣小量韓式罐裝飲品, 泡菜, 同好好食的炸雞。份量分3個Size, 大杯($60) 中杯($30), 小杯($25), 味道有辣味, 甜辣, 醬油。由於我第一次幫襯, 怕唔岩食同已經食左晚餐, 決定要小杯甜辣味試下, 當飯後甜品 (!!!)。

甜辣味炸雞 (小)

因為即叫即「兜汁」的原因, 等了幾分鐘先有得食, 每粒雞都只是微微出煙, 不會燙口, 賣相似咕嚕肉, 食落個汁都有d似, 甜中帶酸, 唔食得辣既我食唔出有辣味, 炸粉唔多, 而且無骨無皮啖啖肉, 真係好惹味好好食呀!!! 話就話炸雞, 但無脆卜卜同油淋淋既外表, 感覺食晒都唔熱氣, 而面個兩條年糕唔算煙韌, 有少少硬, 同街外韓式年糕既質感唔同, 我反而喜歡街外那些有如咀嚼香口的年糕。不過一條起兩條止都沒所謂啦, 主角炸雞好食就掂啦, 下次再黎西九幫襯買桶大既!! Omommm yummmyyyy…..

食到中途 (around 8pm) 見到老闆落閘閂門, wow!!! 想食就早d黎啦, 唔係買晒就無架啦!!

-------------------------------

皇帝雞

深水埗欽州街37號西九龍中心8樓美食廣場

連食三場 + 寶石戲院 (下)

食完/探完吉利尼後，開始漫無目的唔知去邊，糊里糊塗行去往紅磡的天橋上，突然想起早前同事介紹過的「粒粒朱古力雞蛋仔」，就問男友有無聽過：

「你知唔知紅磡有檔買朱古力雞蛋仔好出名架，一粒粒架」
「乜有雞蛋仔唔係一粒粒咩？」
「我指雞蛋仔入面有一粒粒朱古力係入面呀」
「乜有雞蛋仔係一patpat咩 哈哈哈哈」...... （串咀 =v=|||）

無錯，呢間媽味雞蛋仔出名在於有內餡，雞蛋仔包住一粒粒朱古力，而唔係純粹用朱古力色既蛋漿整成的流料。

人未行到已經聞到雞蛋仔香，未見到招牌已見到人龍，即使無認真search過地址，都知道就係這間，果然出名啊。

由於淨係買雞蛋仔，廚房又有幾個爐，所以唔洗等好耐就有得食啦∼

拎上手香噴噴，每粒雞蛋仔有好多溶左既朱古力，而且比較實心，好足料，好好食呀，堅係朱古力雞蛋仔！

連食三場，飽到肚凸（嗯...好像有點不雅的形容詞），再次漫無目的hea行，紅磡除了紅館同大酒店(you know what i mean)仲有咩玩呢????

不知不覺行行下見到寶石戲院，啊~這就是寶石戲院，一間仍保留傳統戲院運作的戲院，一間仍用人手劃位的戲院，一間有3D睇又有舊式35mm電影放映機展品睇又有Marvel Heroes Figures睇的戲院， 真是中西新舊文化大雜燴。我這都市凡人只懂嘉禾UA百老匯，去過認為最(殘)舊的戲院都只係旺角豪華戲院，但低處未算低，寶石戲院人手劃位架，你睇張戲飛，用筆寫座位架（天真港女mode on）。

未入戲院前先玩磅體重機，嘩，呢部機，真係睇陳寶珠年代既戲先見到，同市政局橙色垃圾桶一樣罕有（香港某d郊區仍有這垃圾桶架），最難得的是佢work，磅到重，同好準確！比$2就有得玩，出個張印有殘酷磅數的卡仔好old school好有珍藏價值，我即刻沒收埋男友個張，keep起佢。

寶石戲院得一個院，每日(or每個period)上一套戲，我地去到時剛好15分鐘後開場，播3D蜘蛛俠2，諗都唔諗就比錢買飛，係度睇3D只需$50!!! 而且唔洗自備3D眼鏡，出面睇戲，心血來潮想睇3D，總係要比十幾蚊買副眼鏡，買買埋埋可以開3D眼鏡鋪啦，有無人會收集幾百副然後賣返比戲院呢??!

係度買飛揀位都有個冷知識，除左坐正中間個行中間位實無死外，咪以為愈頭愈差，呢到好似演奏廳既設計，坐得愈遠愈似山頂位，銀幕位置偏低，頭幾行都唔驚睇完頸椎炎（最多大近視，又，好似跳入電影裡面咁，啊，幾咁投入），而我地第一次黎當然中伏鳥坐左山頂位啦哈哈哈，不過都唔差既，係前面條友太高我太矮擋住我咁囉。

至於套蜘蛛俠2決戰電魔好無睇？好睇好正好好笑呀，我唔會劇透比你地知女主腳今集死左架！

連食三場 + 寶石戲院 (上)

係尖沙咀想食韓國野，唔一定要去韓國街，亞士厘道就有個又平又正既選擇。假日扯起條(孖)根，找男友一齊食「肚餓韓國人」，食慣食熟的我倆都知晒架步...

排隊（九成時間都要排，只在於多定少人排）+ 拎餐牌諗定食乜（選擇困難的人表示等耐dd都無所謂）> 
下個到你時就要留意有無人食完走出黎啦（見過有人出黎而排第一個人唔入去，後面d人即刻發出"摺摺"不滿聲）> 
好啦 有人出黎啦 入得去啦 跑去counter同外藉Auntie落order啦（分不清是菲律賓還是真的是韓國人）> 
落完order比完錢就坐底等外藉Auntie拎野你食啦

快捷．方便．好食（我認我上左癮）

凍抹茶牛奶
令我不停翻兜的其中一個原因，呢到的抹茶牛奶好好飲呀！微甜，清新，涼入心，飲晒唔會溜，只是溶冰後有點淡而已。

芝士飯卷
驟眼看好有日本風情畫feel，哈哈。
一碟十數粒，飯比例較少，一個人KO晒全碟絕對無難度，我習慣成粒啪，慢慢咀嚼，嗯...yummyyummy! 芝士味唔濃，其他料雖然唔係咩特別野，勝在平凡而美味。

炒粉絲
這個韓國粉絲口感好似紅薯粉，煙韌彈牙有咬口，味道較為濃烈（重味精？），係道唔錯既小食，值得一吃。

這個下午茶每人承惠$40，係尖沙咀遊客區黎講算平宜啦。

唔好以為我倆係雞仔胃，得兩味小食，邊夠飽丫，一定有下場啦，老早plan好去尖東吉利尼食咖央多啦 yeahhhhh my beloved kaya toast....

~.~.~.~.~.~.~.~.~.~.~.~.~.~.~.~.~.~.~.~.~.~.~.~.~.

一個月前初嚐吉利尼的咖椰多士後，令我瘋狂愛上了，好掛住好掛住咖椰啊（講到好似同咖椰拍拖咁），忍唔住又要再食啦!!!!

今次下午茶時間去，人流比平日夜晚多，只餘下吧檯位，好吧好吧，有咖椰多士食唔好計較咁多。
同上次一樣，首選的 - 無，改為咖椰克力架，再加$10要一份咖椰多士。

下午茶餐 - 咖椰克力架配熱柚子紅茶
柚子紅茶甜度適中，柚子味濃，茶順口不澀，可對之後既咖椰攻擊(?)作舒緩之用。
咖椰克力架一碟三塊，每塊有多到漏晒出來的咖椰醬及一片薄切牛油，拎上手一夾...一咬...咖椰醬滴到成碟成檯都係，幾乎連衫都有，非常「呢咁hea」，真係初次約會不能吃；走女神路線不能吃（你唔會用叉食餅掛）。味道無懈可擊，甜而不膩，充滿椰香與牛油味，縱使食到儀態盡失，最後還是KO了兩塊。

任何套餐加$10就有一份咖椰多士，真係好抵食。

咖椰多士
食完克力架隻手已經黐立立，所以豁．豁出去．用手食埋佢。上次食過，今次美味依然，自家製的咖椰醬配上烘到鬆脆多士，熱騰騰香噴噴∼啊∼好正啊∼

整個下午茶的確係正，雖然克力架麵包多士可以自己買到，但配上吉利尼既自家製咖椰醬，就有一定難度，廿幾蚊有埋杯野飲，值得一試啦。


我相信我會好快再黎。

(續)

------------------------
Hungry Korean
尖沙咀亞士厘道24-38號天星大廈地下B號舖

吉利尼  Killiney
尖沙咀加連威老道100號港晶中心6-8號地下

慶生地 - Wing's Kitchen

壽星女決定生日飯係Wing's Kitchen食，當天晚上七點去到，全場已經滿座啦，呢個黃金時間walk in黎食真係窄窄地，建議book位，除非你唔介意食九點幾啦。

六個女孩一見面就吱吱喳喳講不停，現場環境都唔算靜，適合一班人或三五知已黎又食又講，中途有幾檯唱生日歌，哈哈哈，看來是慶生好地方呢！

炸雞翼
order時有四款醬，可以揀兩款，我們選了水牛城同他他。雞翼本身無味，真係要靠個醬，水牛城醬比較稀身，酸酸辣辣好好味，而配他他醬又係好味，呢兩個醬搭炸野真係無得輸。

小食併盤
又有雞翼啦喂~又係唔dip醬無乜味，這個伴碟醬是沙律醬，dip晒所有炸野都ok；炸芝士雖然拉出芝士，可是芝士味唔濃；炸魚同炸洋蔥就普普通通，炸洋蔥好難一開幾份share食，切完皮肉分離散開晒既。

白汁雜菌寬條麵
食同聞都好香忌廉味，汁既分量適中，都夠撈晒成碟寬條麵，可是我地唔係熱辣辣即刻食，凍左少少後有點乾。

帶子意大利飯
帶子好爽口，飯是有點硬的口感，配上濃郁忌廉汁好好食呀，如果五六個人一齊食，每人只食到兩個湯匙，大夥人黎點菜份量要注意啦。

巴馬火腿薄餅
這個呢...賣相同味道都一般，薄餅無味，其餘配料味道唔突出，單單靠巴馬火腿既咸味真係唔夠，這碟是唯一一碟好無衣食咁食剩左。

豬肋骨跟薯條
睇上去比較乾身無乜肉汁，肉質略為粗糙，食落好韌；薯條就普通，中下的一道菜。

雖然食物水準沒有很驚艷，但供我地六個墟（六個囡）又講又笑足一晚， 中途侍應無催我地，而且時不時幫我地加水，我地玩自拍大合照不成時又有侍應自動請纓幫我地影相，服務100分 （微笑單眼樣）。

聽席間友人講，女廁係另一座大廈裡面，又黑又靜又詭異又危險，怪談味十足，有人陪都驚，不是十萬火急就改去附近商場既廁所啦。

-----------------------------
Wing's Kitchen 
尖沙咀漆咸道南45-51號其士大廈地下C及D舖

頹餐都唔係咁呀嘛 - 青衣城KFC

夜晚十點幾係青衣城睇完戲，餓餓地諗住食埋野先走，間間餐廳都接近打烊，淨返m記同kfc，見kfc最近有隻新口味既雞，就揀左kfc。

食kfc，即係食頹餐，你唔好expect咁多，之但係，大佬，你都唔好咁對我丫，正正常常都好丫，如果要比個分數，0-100...opps...sorry...比0分對佢都係個讚美，負一百就差唔多。 

原式白米炸雞餐 $37.9 

唉，你睇那兩舊可憐的小雞雞，未食已經反胃，又細又乾，廣告呢家野真係圖片只供參考。

個菇飯外貌ok，食落...咦！米黎既！which is 唔熟，同食生米一樣，用汁撈黎食，但係點撈d米都唔會變淋架啦，我不如慳返$37.9返屋企用茄汁撈隔夜飯黎食啦。 

葡撻：thanks god it's normal 

飲品：well, 我要既係百事，並唔係黑色有汽凍水。點解可以無味成咁？你會唔會溝水溝得過份左？ 

 第二間KFC同款炸雞  

我知唔係間間KFC都咁離譜，食其他地區既KFC，賣相是多麼的正常而吸引，青衣城呢間唔該你檢討下。

------------------------
青衣城KFC
我唔會比地址你地架!!

龍眼豆腐花 vs 龍眼椰果冰 - 聰嫂私房甜品

同w小姐食完happy friday dinner，逛完一輪街，w小姐說食埋糖水就完美了，我立即贊成啦，吃貨的人身邊總有一兩個同是吃貨的戰友，在銅鑼灣食糖水，即刻想起聰嫂。 

快要凌晨12點了，聰嫂門外仍然排長龍，拎左飛，心想要等多久呢，哈，唔洗5分鐘就有位了。 

我要了龍眼豆腐花，她要龍眼椰果冰，兩者應該是有點分別吧。 

但上檯是，呃，一模一樣既....　分別只在於一碗個底有豆腐花，另一碗就成碗都是冰。雖然O左小小咀，但那鮮甜的龍眼肉加冰涼的碎冰，配上爽口的椰果和西米露，還有底下那滑溜的豆腐花，好好食啊!!! 

影完都唔記得邊碗打邊碗了........... 

*** suggest大家食龍眼豆腐花，因為價錢一樣，料就多d，食落豐富d ***

-----------
聰嫂私房甜品
銅鑼灣耀華街11號地舖

3個字 - 唔得囉!!! - MoMo Café

在某團購網見到$188 Courtyard by Marriott HK Buffet，心想by Marriott也不會差得去邊吧，就找了W小姐陪我身先士卒。唉，伏就這樣中了。

 一個品牌分了高中低檔次，Marriott也不例外，Courtyard by Marriott HK應該是他們最低最低檔次了吧！ Momo Cafe位於Courtyard二樓，甫踏出lift門，內心即時嘩聲四起，餐廳面積．勁．細．囉！而且冷熱葷少得可憐，甜品區亦單眼望晒。自我安慰意識開動，可能人家貴精不貴多呢.... 

大！錯！特！錯！ 

1st Round 冷盤 
青口，鯛魚：雪藏味重 
壽司：舊飯硬如石頭，雪太久了嗎？ 
中華沙律，凍豬肉腸：本身要雪住同凍食，所以食落可以接受 
難食三兄弟：呢pat野，我都唔知係咩名堂，好難食囉 
W小姐食左幾條蟹腳，食食下會出水，出雪藏水。 

2nd Round 熱葷 
如果你認為比$218(連加一)任食泰式炒飯呀咕嚕肉呀係okay的話，其實熱葷味道是可以接受，同茶記煮出黎差唔多。 

3rd Round 麵食 
唉，無乜野揀既情況下走去食麵，佢仲要煮勁大碗麵..... 
湯底係豬骨湯，但成碗野都無乜味，咁清淡我真係覺得自己好健康囉。 

食到中途有唔記得咩牌子既啤酒同薑梳打水揀，揀無可揀，要了薑味梳打水，飲落，嗯，梳打水一杯，啖而無味是想舒緩客人味覺上的不適嗎。 

4th Round 甜品生果 
甜品：唯一ok是藍莓芝士餅，佢秉承其一貫作風 - 啖茂茂，唔膩。其他個d，游走於怪味與難食之間。 
生果：正常。（如果生果都難食咁間野可以摺得） 

 5th Round 雪糕 & Pancake & 豆腐花 
雪糕：普通...味道唔突出。 
Pancake：塊pancake正正常常，提供d配料同醬都無乜特別，但裝醬個d樽全部都好污糟咁囉。 
豆腐花（唔記得影相tim）：暖暖地，睇樣好似唔錯，但口感超鞋，係出面都好難食到咁鞋既豆腐花啦。

Last Round 湯 & 沙律 
呢間野一定係主張清淡同健康，食buffet要多多菜唔要肉，所以佢既沙律吧賣相唔錯，食落ok!! 呀~~ 食左成晚終於有樣Encore啦）））） 
湯：同金寶羅宋湯差無幾。

 ps 有燒西冷牛扒，可惜我唔食牛 
pss 有三文魚刺身，食到後段先出場 
psss 有幾款甜品MENU有但現場從來無見過 題外話/補充資料 

結論：團購無好野（但人總是重複犯錯），Courtyard by Marriott HK Buffet正價或優惠價都不建議來

-------
MoMo Café 
西環干諾道西167號香港萬怡酒店

一條囡囡遊台灣2014 - DAY 3

第三天啦要走啦…. Checkout時行李可先寄存hostel。

第一站食早餐，左揀右揀最後選擇食豐盛號!! 豐盛號出名豐盛吐司同紅茶牛奶，而且數量有限，先買先得。當日我10點多去到，幸運地唔洗排隊買野食亦唔洗等位，點知落單妹妹話豐盛吐司同紅茶牛奶買晒…. (懶床!!! 懶床!!!!!!)，改要肉蛋吐司同蔗糖紅茶啦 T___________T~

影到反晒光的攝影技術

豐盛號位於民居，而且面積唔大，得一張大檯，要堂食就要順住坐，即是唔可以因唔想同陌生人一齊坐而中間吉個位，目睹有個姨姨初時格個位坐，食到中途店員禮貌地叫佢坐入一個位，點知佢將餘下半塊吐司塞塞塞入口(!!!)，再骨骨骨啪晒成樽奶(!!!!)，然後拍檯(!!!!!)走人!!! 傻的嗎咁糟塌美味的食物….. 記得到人家地方就遵守人家的規則啦。

覺得正爆可以買包包返屋企, 好似第二日就要食晒

蔗糖紅茶到~~ 飲落係鮮甜，而唔係溝甜漿的死甜，好好飲呀，不會溜!!，沒多久肉蛋吐司也上檯啦，好香!!!!!!! 咬落去熱辣辣軟綿綿充滿奶香蛋同肉之間有點微甜的忌廉中間芝士唔會好滯，好好食呀，以後食唔返點算呀 (薜家燕mode)，真係真係好好食!!!!!!!! 個包無得輸，係食過最好食的包。

走既時候聽到落單妹妹話如果想食到豐盛吐司同紅茶牛奶，最好8點半前黎到啦!!

下一站 - 科學教育館，第二個最期待的地方，LINE FRIENDS互動樂園展覽!!! 係捷運士林站1號出口過馬路，轉搭公車紅30、紅12、620、255、科教館落車就可以啦。食完豐盛號出返大街就見到成排巴士站，剛好有架紅30到站，見到科教館既字眼就衝左上車，點知咪搭錯車囉。

去到總站，故宮，唉，既來之則安之，打算參觀下故宮啦，但眼見一團團內地人，唉，放棄，搭紅30去返科教館 (我唔係歧視d咩，但真係唔想黎到台灣都要迫)。

登登登登登…. HERE I AM!!

本來對LINE人物都無乜特別感覺，但佢出D sticker愈來愈正同抵死，仲有d打工仔sticker同木咀熊大(?)同cony既情侶sticker，line既員工一定做過research先整出黎，唔係點會咁頂癮XDDD

平日黎好少人呀，好爽呀，點影都唔會阻到人

熊大唯一有表情只有滴汗，好似木咀，哈哈哈哈哈哈哈

睇完展梗係想你買下野食下野啦

睇完去食TEA，揀左有好多綠茶產品食既和茗甘味處。係東門站5號出口出，轉入永康街一直行直行呀行再轉入金華街就係啦，平日黎到，食客唔多，休休閒閒好寫意啊~~

隻狗係車底訓覺唔驚被車死嗎.......

沿途都好多野行

呢到有好多綠茶SET，花多眼亂，心大心細，猶豫不決，選擇困難 (4字遊戲?)，最近揀左抹茶提拉米蘇，寫住味濃喎，就試你囉。

食完，最正係柚子凍(!??!!)。雪糕奶味濃，可是茶味少。提拉米蘇真係濃茶味，但由於我食晒雪糕先食提拉米蘇，有少少飽滯左，而柚子凍就解決到飽滯既問題。整體是不錯，而且NT$250有3樣野，經過的話可以一試。

本想去西門町血拼一番，最後變卦去上引水產買手信(!!!!!)。

買了兩PACK熟蟹，再即場買個冰袋 (NT$250一個送冰PAD)，去到機場用濕毛巾包好，上鎖，寄艙，當是給家中兩個男人的小小心意。

另，4點幾去到燒烤區都係唔多人，立食區等既人都係唔多既。平日真係少人d定已經唔出名呢?

d蟹返到屋佐即刻放入雪櫃，第二晚食仍然oishii呢

回hostel拎行李，到台北車站搭車到機場，三天台北之旅就此完結。

--------------------------------------
真係好鍾意台灣, 每年黎一次都唔會厭, 地方永遠去唔完, bookmark左幾間cafe都無時間去, 繼續努力搜尋更多台灣資料, 下次再去不論一人定有伴, 希望行程更加精彩有新意吧 :)

豐盛號
台北市士林區中正路223巷4號1樓
營業時間:
平日7:00-11:30(售完為止)
週末及國定例假日8:00-12:30(售完為止)
星期日公休

和茗甘味處
台北市大安區金華街221號