樣靚卻欠質素 - Fullhouse Signature

行到K11後門，會見再間裝修得好Fancy的餐廳，走可愛路線的女孩經過，肯定會驚叫再衝入去。

夜晚八點黎到，walk in直落有檯，邊行邊發現呢間餐廳真係好夢幻童話公主Feel，當然啦，佢主sell婚禮喜慶，亦有子公司/母公司做影婚紗相，嗯，難怪。

再次強調：餐廳室內裝修好靚好Cute，有晒布景板、靚檯靚椅、自家設計公仔人像供食客影相，黎影相，一流；黎食野，一般！

炸蟹餅
賣相精美，蟹肉好足料，味道略嫌啖口，普通。

巴馬火腿多士
最好食這個，火腿夠晒咸，配埋芝士同脆多士，味道豐富，唔錯唔錯！

野菌黑松露意大利飯
這個飯，最好食係面個幾條荀，爽口而鮮甜，頂個舊芝士塊，唔掂... 好重油益味，唔放好過，飯係幾creamy，可是就算二人share，都好滯，好在份量唔多，滯極有限。

順帶一提，呢到有水提供，但要主動同侍應拎囉。雖有可愛包裝，但吃貨女的我表示試過一次就夠。

總結就是：
選擇不多
價錢偏貴
份量偏小
水準一般
沒有下次
(玩4字詞嗎.....)

------------------------------

Fullhouse Signature

尖沙咀加拿芬道25-31號國際商業信貸銀行大廈地下1A舖

由頭到腳, 由內到外, 盡是榴槤味 - 貓山皇

跟男友兩個來到元朗遊玩，本想到惠康買支水再諗食乜晚餐，甫踏入惠康，陣陣榴槤香氣迅速竄入鼻孔，繼而走均全身再直奔大腦，啊 媽呀 我好想食榴槤呀！想食的慾望令大腦閃出元朗有間專食榴槤甜品的「貓山皇」，立即搵下係邊，地點就係出惠康過馬路再轉彎就到！好近！

六點黎到，店內小貓三四隻，正常啦呢段時間，餐廳內設計走摩登現代路線，牆整成貨櫃幾有特色，又整了玻璃廚房，街外人可以睇甜品製造過程。

果真，成間都是食榴槤的，那種找到心頭好的幸福感加滿足了慾望的快感，難以形容....

夢幻貓山皇榴槤雪糕
基本上是每檯必叫，上檯時d煙出到baba聲咁(?)，如此夢幻，相機先食是常識吧。影影影影左十張後，煙開始無啦，雪糕開始溶啦(T_T)，d煙對雪糕既味道都無乜關係，呢好雪糕好重榴槤味！食落口感幻滑，加上芒果汁珠珠同杏仁片，視覺同味覺都唔會太單調，而且甜味適中，只係個塊酥就淋左少少囉。

貓山皇脆皮夾餅
呢個！神級！推薦！上面個雪糕係好重榴槤味，但總係差緊少少野咁，欠個令口感更豐富的榴槤肉呀！無肉咬下總係唔實在，如今這個貓山皇脆皮夾餅就是徹徹底底的實在！有口感！夾餅皮凍而脆口，配埋啖啖雪凍了的檔槤果肉，好香好美味呀））））

下次黎元朗我會再食你！

------------------------------------

貓山皇 Musang King

元朗仁樂坊5號利發大廈D舖

平得黎好食 - 花田讚岐手打烏冬

夏天到啦, 又係時候巡游(!)港九新界離島泳池啦….
今個星期揀游元朗泳池,黎到元朗當然食完先有力游啦, 係去泳池途中見到呢間「花田」, 諗住食少少野醫肚姐, 都無Openrice下就入左去了。

Lunch time黎到當然有set lunch叫, 又可以叫餐牌上那些有圖有真相的食物, 同時又有tick紙仔上列晒單點壽司或壽司拼盤 (sad…紙仔上那些壽司無圖提供…), 幾十萬樣野分開黎睇, 搞到有選擇困難症的我都唔知食咩好, 心大心細, 諗左三億個光年先諗到食乜。

Lunch Set – 特色三文魚丼 跟玉子及蟹子
再跟埋道地綠茶一盒, 前菜同蟹子沙律, 都幾抵食!!
前菜: 中華沙律+螺肉: 我估係街外現成買返黎咁, 無乜特別
蟹子沙律: 同樣無乜特別,

主角三文魚丼
唔知點解… 我覺得個碗有d似狗兜…. (小姐碗飯你食返架), 玉子及蟹子既份量比想像中少, 尤其係玉子, 我以為係一片片… 唔係一條條……….
反而三文魚就比好多, 難道係元朗入三文魚貨係平到近乎唔洗錢? 三文魚都算新鮮, 再配壽司醋係幾好食既, 整體味道唔錯, 略嫌得三文魚送飯齋左少少, 至於賣相就….嗯…..呃…. 算啦, 抵食就夠啦。

火炙油漬三文魚壽司
但凡火炙過的壽司係我心中已加50分, 呢個更加係100分!! 火炙把三文魚油迫晒出黎, 再加上油漬微咸調味, 好好食呀~~

鰻福卷
微微的鰻魚汁加上芝麻，食落好香好夠味，卷著鰻魚同玉子，口感豐富，好好食呢！

埋單$110，唔算貴，Lunch set個三文魚丼既份量雖然多而且平，但味道真係一般，壽司反而有驚喜，大家可以一試單點壽司。

-------------------------------------------------

花田讚岐手打烏冬 Fatin Sanuki Udon

元朗教育路51-61號紫荊樓一期G號地鋪

椰王燉鮮奶!!! - 甜入心 Heart's Dessert

第三次食甜入心啦，這個椰王燉鮮奶加湯丸真係好正，要大力推介~~~

任飲任食的啊~

上次黎已經係半年前，今次黎到Menu換左好多新甜品，但我仍固執專一地選了椰王燉鮮奶，無計，和愛情一樣，遇上自己愛的，就不想再試其他了..... （吃甜品也要說人生道理嗎）

椰王燉鮮奶加湯丸
熱食的，店內冷氣蠻大，熱食也不怕。面層是細細粒的蔴蓉湯丸，不會太甜，煙煙韌韌；下面是燉鮮奶，加了椰汁好香好好味，甜而不膩，正呀）））

椰汁黑松露雪糕布丁
其實唔記得全名係咩啦，總之有上面三樣野啦。雪糕有好濃烈的黑松露味，我自問就頂唔順！布丁同大菜糕就頗為普通，總之整個甜品充滿黑松露味，吃不出其他味道啦...

兩個都用椰子裝住，咁椰殻入面d椰似又食唔食到呢？當然....得啦...如果你有心機出盡奶力地刮。

基於無聊；基於好奇，我倆努力刮d椰肉黎食，好似前世未食過椰肉咁，其中一個仲刮得好完整！至於味道呢...麻麻地啦，無乜椰子味，咬幾啖已經好滯了 （嘿 無聊的孩子）。

-----------------------------------------
甜入心 Heart's Dessert

深水埗福榮街57號文昌閣地下B

好食但唔特別 - 李家 Chicken HOF & SOJU

我買既係Take away  - 可樂 加 炸雞。

本想坐低慢慢食，但條人龍長到無譜，大熱天企一個至個幾鐘，我想我實出晒面油兼夠拎黎做炸雞了。

Take away的選擇呢.... 只有大份和細細份雞，沒有中間，今次初嘗李家炸雞，叫細份保險d。

見廚房不停炸呀炸呀炸，炸到無停手，好快就出到雞比我地，拎上手都幾大杯... 我指個可樂杯，雞粒細細粒容易食，提供埋牙籤同二指套，唔怕整污糟手，好貼心!!

雞既份量就少左d（即可以飲多d可樂），雞既味道呢，又熱又香又脆，mix埋甜酸醬同芥茉醬，幾惹味，唔知係咪成隻雞都可以炸呢，食唔出係雞既邊部份，全部肉都算嫩同Juicy，係好食但唔夠特別，唔知堂食仲有咩其他菜式，如果排個幾鐘食這個炸雞，我個人就覺得不值了。

--------------------------------------------
李家 Chicken HOF & SOJU

尖沙咀金巴利道84號金閣大廈地下

窩夫以外的選擇 - 甜牙牙

聽左甜牙牙個名好耐，也知道那個超級無敵九層塔(super~~)，想試想試就係差緊個時間去試。這日同男友行街行到黎新都會，見到G Floor有間甜牙牙，二話不說就衝入去食，一向對「甜品時間」無乜慨念，不會跟什麼食完飯先食甜品的規矩，所以當晚七點幾黃金晚飯時間去到，唔洗等就有位嚕∼

入面睇落算大，但d檯同檯中間既空間就貫徹街外小型糖水鋪格局：店員示意我們坐角落頭的二人檯，那條檯與檯之間的隙縫窄過維港，我zip完入去坐後，鄙人之patpat竟然無整跌鄰檯的餐單呀筆呀真係忍不住講句「i am so slim」XD

餐牌是很貼心的有圖有真相，幾乎每款都有樣睇，男友同我覺得邊款靚就點邊款（睇食物還是吃食物呢...）
低b時間：meun入面出現好多「芭啦娜(sth like that)」，睇左好耐先知係banana，香蕉... 哈哈哈哈哈，咁「咩糕艾史廉」係咪Mango Ice cream!?

Vxxxx (唔記得英文點串) 朱古力木糠布丁
比想像中大個，雪得好實，吉落質感似蛋糕，食落係雪糕，好快溶係口中，濃郁的朱古力味，口感與味道不錯，食到中間又有粒粒朱古力咬，喜歡 : )

提拉米蘇窩夫
實際賣相差d... 窩夫脆卜卜帶點肉桂味，配上吉士醬食，味道沒有驚喜，普普通通，反而旁邊那個「芭啦娜提拉米蘇」就非一般Tiramisu，中間夾住香蕉蓉，底層是蛋糕，一齊食好配合好特別，我可以不吃那個窩夫只吃Tiramisu嗎.....

估唔到甜牙牙主打的窩夫比不上旁邊的配角，建議大家黎食唔一定食窩夫，可以試下其他。

----------------------------------------------
甜牙牙  Sweet Tooth
葵芳興芳路223號新都會廣場地下167號鋪

愉快團購經驗 - 點心宅急便

過往幾次團購經驗很差, 今次又抵唔住頸, 見到某團購網做$38食四款點心,兩個人加埋$76(未連茶芥)就食到八款點心好似好抵咁, 本著「見過鬼仲可以唔怕黑但要識拎定十字架」既精神, 買之前做d research, 證實呢間野係正常既先買, 又係食之前將佢提供比我地揀既所．有．點心．起．晒．底．Mark底邊款必食, 邊款係伏.... 食團購食到咁, 真係死而無憾。

貓紙 – 但我相信有heart既食市會有quality control, 明白失敗仍成功之媽媽

點心宅急便既位置都幾隱蔽, 與其講係棉登徑, K11附近, 不如乾脆話係豚王對面 (如閣下唔知尖沙咀豚王係邊, 咁繼續搵棉登徑, K11)。7點幾同男友黎到, 人客唔多, walk in應該無難度。飛快拎出貓紙tick我地食邊八款點心….

蜜汁叉燒腸
叉燒腸首先上檯, 賣相討好, 清晰可見舊舊腸粉都有叉燒餡, 有D叉燒仲大過舊腸tim, 足料到你丫….但腸粉皮唔夠滑, 食落一般啦~

三色點心拼
我以為係三隻唔同顏色ga tim… 哈哈哈, 最好食係鮮蝦菜苗餃! 粒蝦好爽, 配埋菜苗口感豐富好好食!! 雞粒鮮蝦粉果比男友食左, 佢食完無乜評價 =v=||| 至於野菌素餃就略為遜色, 野菌無乜味, 加埋同樣無味既餃皮黎食, 好似食緊麵粉咁。

魚肚滑雞扎
每次食雞扎都有個疑問, 有無人會成舊雞扎一齊食而唔拆開晒入面d餡呢!? 這個雞扎味道唔錯! 腐皮包住雞肉, 火腿同魚肚, 每樣都幾大舊, 最重要既係佢唔會太咸, 感覺味精唔多, 值得一讚

鮮蝦菜苗餃
又鮮蝦菜苗餃….唔記得點解會叫重覆了, 不過無所謂啦, 這個真的好好食!!

蟹籽燒賣
出面酒樓食一粒燒賣飲三杯茶都解唔到咸味同口腔入面既味精, 最終搞到成肚茶/水, 無晒食慾, 但呢個唔會, 食完兩粒燒賣都無衝動飲茶, 而且蝦又爽, 肉又實, 堅係正。

豆乳湯腐皮卷
個湯好香豆乳味呀, 腐皮卷真係好滑呀, 呢個要大力推介呀 )))))

芝士蝦春卷
究竟有隻蝦叫芝士蝦定係芝士包住d蝦? 食唔到有芝士味, 蝦變成肉醬, 脆卜卜熱辣辣係幾唔錯既, 不過d餸好快黎齊, 我地食唔切, 凍左就麻麻地啦。

流心芝麻球
流心???? 無流心既…………………. 半粒起一粒止係ok的, 都幾甜同油膩, 最後個粒你推我讓無人肯食。

食物整體唔錯, 服務亦好好, 侍應自動幫我地加水, 見我地對三色餃有疑惑又主動解答, 令我倆有個愉快的團購經驗。

------------------------------------------
點心宅急便
尖沙咀棉登徑23號地下