的確好食!! - 焗廚 Oven Kitchen

星期六夜晚9點幾同男友黎到荃灣搵食，即刻想起新開又上過榜既「焗廚」。去到門口見到一排人坐晒櫈仔，以為有排等位啦，望入店內時剛好與店員有眼神接觸，他look大雙眼，我即豎起兩隻手指，他揮手示意我們入去，人與人之間既溝通有時真係好奇妙啊，哈哈哈哈。

原來入面有幾檯吉檯，出面既人可能係等大雞大啦。餐牌內食物種類都幾多，目標明確的我倆好快就決定好啦。

凍檸檬利賓立 & 青檸梅子特飲
利賓立同出面一樣囉，而青檸梅子特飲啜第一啖時酸到開眼！後來左攪右攪又溶下冰味道先偏酸帶甜，飲左大半杯後，男友手多把梅子攪爛後就變得酸酸咸咸，哈，一杯三味喎，幾特別。

瑞士雞翼
雞翼皮炸得脆脆，食落唔會出晒油，可是瑞士汁略為一般，沒有太多驚喜，而伴碟的沙律菜淋上少許蛋黃醬，把伴碟菜味道變得豐富，從不食伴碟菜的我把它清光呢。

蘇菲黑松露芝士餡餅
上檯時香噴噴，第一口咬那尖角位時充滿濃烈黑松露味，香脆可口，之後幾口就沒什麼黑松露味了，反而變了蕃茄醬和芝士，這個食到拉出芝士，睇同食個個都頓時興奮，每人吃兩塊都不會滯呢，推薦！

芝士忌廉龍脷柳焗飯
飯像是炒過，乾身有口感，芝士同忌廉份量適中，不會太少撈唔到飯或太多令人飽飽滯滯，此飯的龍脷柳則普普通通，但整體也是好吃。

埋單約$130，真是又平又好食呀。

焗廚  Oven Kitchen
荃灣大河道昌泰街9號地下

一條囡囡遊台灣2014 - DAY 2

第一晚訓Hostel好好訓呀，起身時roommates都未起身，我既貪睡模式鬧鐘會唔會嘈到佢地呢…

8點半起身，9點半出門口，早起的鳥兒有魚吃~~ 第一站 – 上引水產!!! 此行去兩處本人極為期待的景點，其中一處就是上引水產啦，本人今次係第一次去，究竟係咪真係咁正呢??

上引水產既背景同特色唔洗我介紹啦，好多港人都識，唔識既就自己google啦，我copy & paste比你睇都無意義。搭捷運到行天宮站，出左轉的士，搭過幾次車資都係NT$84，行路就需20分鐘。多口既的士司機聽到我話去上引水產，問「香港來的嗎？」，哈哈哈，睇黎上引水產係香港人眼中真係必到啊!!

現場的確大量港人

濕貨區係咁大咋

嘩...好大隻呀

讓我跌進三文魚海吧~~

如果我伸隻手指落去會點呢??

我想起芝士E麵.........

讓我躺在海膽床上吧~~

即叫即 "湯"

10點去到，唔洗問阿貴即刻仆去立食區拎飛等位先，早上10點咋，立食區已經有人排隊等開啦!!! 以為第一輪就入得，點知入面未坐滿就截龍了，我要等第二輪啊，唯有等叫號碼時逛逛濕貨乾貨區啦。整個上引水產的面積比我想像中細，好快逛完，開始諗等陣食乜同盤算點樣買熟食水產做手信比屋企 (!!!)。等了半個鐘就入得去食啦YEAHBABYYEAHHH。

日本黑鮪(唔記得大定中腹)壽司一舊，但我記得要NT$190!!!!!!! 一舊!!!!! 我係咪太早起身傻左???????? 食咁貴???????

食評: 好味到核爆爆爆爆，你睇佢個樣靚到… 甘甜美味，口感滑膩

當日無晒馬糞海膽，轉叫淮山海膽

食評: 好味到核爆爆爆爆，你睇佢個樣靚到… (again) 入口溶化，絕對新鮮

炙燒握壽司 (4貫)，有三文魚，同埋……….. ?

食評:用火熗燒過，迫左d油出黎，好正呀!!!

叫埋杯綠茶埋單承惠NT$620

如果你食得多可以一人叫個特選握壽司，十貫才是NT$600。我想我是全場食最少既人啦，左邊一家三口食到開香檳影相，右邊情侶叫了幾板握壽司幾款小食前菜，而我!! 食咁少!! 浪費唔洗等好耐就食到既機會!!!

食完才11點幾，時間尚早，走時看到戶外的燒烤區大把位呀，如果大家想食可以平日上午過來呀。

係上引食完唔夠飽，搶個空檔食埋甜品。去了位於忠孝敦化的Uzna Omom 杏桃鬆餅屋，位置離捷運有點遠，係忠孝敦化4號出口轉入內街行十分鐘先到。12點已經坐滿了大半啦，簡約裝修，餐牌超可愛呢，這裡有個出名的雙層厚鬆餅，可恨我一人吃不了，唯有要個Honolulu熔岩鬆餅，是「融合北海道鮮奶油的香醇及夏威夷果仁的濃郁口感」，再配杯OMOM杏桃無酒精氣泡飲。

好似香港個咖啡弄。又，香港個咖啡弄我有食過架，排左三個鐘，都夠由銅鑼灣搭車去機場再搭飛機到台灣啦。痴線。

單層NT$220，雙層係NT$250 ?!?!!! 百佳買兩件平D手法??!?!?!

CUTE MENU

聽聞抹茶漂浮係要自己落手搞先有得飲

WOW了

原來單層厚鬆餅都好有份量!! 上檯時濃濃的奶油香直奔大腦，加上賣相可人，令人食慾大振啊，食落口感鬆軟，甜度適中，好好味呀!! 伴碟是”O””M” ”O””M”的鹹小餅，可以中和吃太多的飽滯感 (umm…人家的原意是這樣嗎?)，至於杏桃氣泡飲就較為一般，底部是桃肉，可是我左攪右攪依然沒太多桃味，雖然味道偏淡，配吃甜甜的厚鬆餅卻非常合適。

之後我… 竟然返hostel歇歇…. 有咁攰嗎… 行少少路姐... 老闆有我這個員工真是sosad…

抖完hea完就去中山地下書街啦，中山地下書街就係捷運中山站2號出口，真係好易就去到，如果你每次來台北都會逛誠品，不妨去去中山地下書街，附近又有台北當代藝術館，可以行一個下午。台灣買書本來就比香港平，而當日書街剛好做優惠，平上加平忍唔住買左幾本。

好正呀，比人當街練武(舞)

我諗起有朋友講旺角有間CD鋪個鐵閘都有油油架，不過係紅色既，比人沐上去既。

行完書街又未餓，決定去utravel介紹集於 Cafe 、劇場、精品小店等文化館的「光點‧生活」，然而… 有點失望囉。建築設計很有外國味道 (當然啦，前身是美國駐台領事館喎)，入面全是cafe，展品得很少，逗留10分鐘就走了。攝影發燒友來影下相唔錯的，但我影到古宅心慌慌咁就知我影相能力有幾強啦。

咩戲呢??????????????????

晚餐去京都屋食鰻魚飯。來台北食鰻魚飯首選是肥前屋吧，research過食之前是一條長長人龍，立即放棄，唔想黎台灣都要好似香港咁排隊為呢樣個樣。去次選京都屋 (其實黎台灣食咁多日本野我下次乾脆去日本啦)

約7點到達，剛好有檯，餐牌非常京都feel，雖然我識睇中文字，但無圖睇我真係唔知咩黎，「鰻錦系」???「鰻重」??「夢幻鰻dong(唔識打井字中間有粒點個字呀)」??? 最後亂黎叫了「鰻錦系 小」，店員話會有蛋絲，我心諗，仲好啦，唔洗咁齋。

叫貴餐先有圖咋

上檯啦，原來仲有幾粒漬物同麵鼓湯。一開蓋，嘩，真係有蛋絲呀…………….

感覺好似你去買macbook air，店員話盒內會有發泡膠粒，你心諗，仲好啦，護住個macbook air，點知貨到開箱時，眼見全是發泡膠粒，伸手抽獎咁巢先搵到macbook air咁

而味道呢，一般般啦沒有很驚艷，醬汁偏淡，唔會有令人想撈飯食既衝動，而且呢，我平時係百佳買現成煮好的鰻魚差不多，份量仲多d呢!!

食飽飽後做孝順女去101幫媽咪蕎麥茶，佢話飲完好好訓同血糖降低左，問sell蕎麥茶個姐姐係咪真架血糖會降低架，姐姐話唔會囉，哈哈哈哈哈哈。算啦，媽咪開心就好。

去101搭捷運時要留意列車終點站係岩先好上車呀，唔係就萬世輪迴搭錯車啦

101都有小籠包吃了

Buy this wo, good wo............

買左好多，用黎送禮自用。拎住咁多野，梗係光速返hostel啦，聽日繼續早起的鳥兒有肉吃~

------------------------------------------------------

上引水產
台北市中山區民族東路410巷2弄18號

uzna omom 杏桃鬆餅屋
台北市大安區忠孝東路四段216巷19弄16號

中山地下書街

捷運中山站EXIT 2

光點‧生活

中山區中山北路 2 段 18 號

京都屋

台北市中山區天津街41號

11:30~14:30 (14:00最後點餐) 17:30~22:00 (21:30最後點餐)

101

咪台北101捷運站囉