古朴年代咖啡．酒館 + 甜豆甜品專門店

係大水坑踩完單車「循例」openrice一下附近有咩好食，最後找到大圍的古朴年代咖啡 酒館。

晚上七點去到，沒有訂檯想碰碰運氣，哈！餐廳室內全。FULL！要麼等到八點半，要麼坐室外的可吸煙座位享受二手煙。基於踩完單車有點發軟蹄及餓到核爆的情況下，二手煙就二手煙啦！好彩好孩子受到幸運之神眷顧，整晚都沒有人吸煙呢 （歡呼）

我們坐室外，對餐廳內的裝修設計擺設格局完全(偷)睇唔到，看其他食評家相片內籠應該很台式吧，可惜我們只看到大圍街景...

Menu厚厚以為好多選擇，騙人的，全日的早午晚下午茶宵夜菜式all in one，我倆神速選好三味菜，同樣地，他們神速上齊三味菜。

炸芝士先到
脆卜卜，熱辣辣，可以拉出芝士，雖然芝士味不濃烈，卻不會有漏既感覺，旁邊菜都幾爽口，略嫌黑醋較少，食到底層要乾啃。酷愛芝士的人推薦

第一條炸芝士剛剛食完，水牛城雞翼就到啦，脆卜卜的外皮，不會油淋淋，dip上酸辣醬，一流！

正在為剛到的水牛城雞翼拍照時，海鮮蕃茄扁意粉就到啦，洗唔洗咁快!? 以賣相黎講，此意粉...一般，味道...同樣一般，蕃茄味唔夠，蕃茄汁太稀，兩隻去殼蝦同意粉都爽口，但真係無乜味咁囉............

點解要強調上菜神速呢，因為d菜黎太快，又唔係食得快就自然變凍晒（嘩好順口喎），特別是炸芝士，最後食個條因為凍左變成食年糕咁樣，這個要扣分啦。Anyway, 都值得一試, 記得訂檯囉。

- - - - - - - - -

係古朴年代食完晚飯，看看時間，咦！八點半喎，立即想起係同一條街街尾的甜豆甜品專門店。這間甜品鋪非常巴閉，唔到夜晚八點半後都唔開，但偏偏有大班人願意為她瘋狂，好似今晚咁，門都未開已經有十幾人等緊啦，受幸運之神繼續眷顧，我們坐到最後一張二人檯（歡呼）

桂花燴梨配野莓雪葩
十分滿分我比九分，整個梨就是甜甜爽爽的，即使食飽飯你仍然會食得落，口口清香的桂花味，且絕不死甜，野莓雪葩酸酸甜甜，與桂花梨配合天衣無縫，唯一扣分的是雪葩溶得超快，當時天氣都幾涼仲帶點寒喎，竟然食左幾淡雪葩就溶 有水出 失了實卜卜的感覺，快到無譜有少少失望。

咖啡二重奏
咖啡味雪糕配上咖啡味啫喱，兩者配搭沒什麼特別，你還你我還我咁，但全部有濃郁咖啡味，尤其是上面個雪糕球，咖啡味濃味爆燈，又無上面個雪葩溶咁快，值得一試。

Overall 好滿意，抵你咁招積！