旺區唔想等太耐之選 - WIRED CAFE

一次無聊在openrice搵新野試時, 就搵到這間Weird Cafe...oppsss...係Wired Cafe先岩, 有好幾次search weird cafe, 見到no result先發現自己打錯字 (我信總有一撮人跟我犯同樣錯誤, 嘻)。

今晚黎到銅鑼灣, 想都不想別的, 就拉男友去WIRED cafe共誰晚餐。七點幾黎到,拎飛等位是意料中事, 由於個個見到等十幾張就走晒去行街, 而門口個哥哥叫得好快, 飛得好快, 叫左三次號碼無人應就下張, 所以唔洗15分鐘我地就有檯啦 YEAHBABYYEAH!!

初次黎到, 樣樣都想試, 但又驚中晒伏, 最後選了餐牌上有「舉起大姆指」的標誌的食物, 雖然, 其實, 儘管, 都有可能中伏XD

明太子意粉
食意粉上半邊包係意味著什麼呢? 之不過個包幾好味, 好軟熟, 面有少少油 令麵包濕潤更易入口。個意粉亦好好味!! 口感creamy, 濃濃的明太子味道, 意粉都爽口彈牙。推介!!

芝士章魚小丸子
芝士就只是鋪係碟面d芝士, 主角章魚小丸子比街外20蚊一盒的好 (當然啦, 價錢都差好遠啦), 麵糊唔多, 章魚餡得一粒, 外表燒得幾脆口, 好食但唔算驚艷囉。 (又, 有d街邊20蚊盒都唔差)

沖繩紫薯Pancake
對這個充滿期待, 實際賣相都好精緻, 食落呢…. 差dd….
紫薯入面原來有一小球雪糕, 被熱pan熱溶了變成奶水, 食落都唔知雪味道係點了; 蛋皮好香好鬆軟, 略嫌份量偏小, 唔夠夾埋紫薯蓉黎食; 相反, 紫薯蓉份量幾多, 兩個人食有d飽滯, 味道唔算好甜, 唔知食乜甜品可以試下。

------------------------------------------------
WIRED CAFE

銅鑼灣軒尼詩道500號希慎廣場14樓1403-04號舖